وەزارەتی خوێندنی باڵاو توێژینەوەی زانستیی هەرێم رایدەگەیەنێت، “لە سبەینێوە دەست بە دابەشكردنی پاڵپشتی دارایی خوێندكارانی زانكۆ و پەیمانگاكان دەكرێت”.
بەپێی راگەیەندراوێكی وەزارەتی خوێندنی باڵا و توێژینەوەی زانستیی هەریچم كە وێنەیەكی دەست تۆڕی میدیایی ئێستا كەوتووە و تێیدا هاتووە، ئەمرۆ شەمە د. ئارام محەمەد قادر وەزیری خوێندنی باڵا و توێژینەوەی زانستیی هەرێم لە نووسینگەی تایبەتی خۆی لە شاری سلێمانی پێشوازیكرد لە د. ماكوان جەمیل مستەفا بەڕێوەبەری گشتی بانكی هەرێم/سلێمانی.
لە كۆبوونەوەكەدا گفتوگۆ لەسەر پرسە داراییەكان و خزمەتگوزارییەكانی وەزارەتی خوێندنی باڵا و زانكۆكان و كراو هەردوولا جەختیانكردووە لە كاری پێكەوەیی و هاوبەش لەپێناو تێپەراندنی كۆسپ و گرفتەكان، بۆ ئەم مەبەستە لەلای خۆیەوە بەڕێوەبەری گشتیی بانكی هەرێم لە سلێمانی جەختیكردوە لەوەی كە خزمەتكردنی خوێندنی باڵاو تویژینەوەی زانستی لە پێشینەی كارەكانیان دەبێت و هەموو هەوڵی خۆیان دەخەنەگەڕ بۆ ئەوەی خوێندنی باڵا و سەرجەم سێكتەرەكانی تر لەچوارچێوەی توانا و دەسەڵاتی ئەواندا هیچ كێشەو گرفتیان بۆ دروستنەبێت و هاوكاریی سەركەوتن و سەرخستنی پڕۆژەكانی زانكۆكان بن.
لە راگەیەندراوەكەدا هاتووە، لە كۆتایی كۆبوونەوەكەدا بڕیاردرا لە سبەینێوە دەستدەكرێت بە دابەشكردنی پاڵپشتی دارایی خوێندكارانی و خوێندكارانی زانكۆ و پەیمانگاكانی هەرێمی كوردستان.
