دەزگای نهێنیی کۆشکی سپیی ئەمریکا رایگەیاند، کە پاودەرێکی سپییان لە ناو کۆشکی سپیدا دۆزیوەتەوە و بەهۆیەوە سەرجەم ئەوانەی لەناو کۆشکی سپیدا بوون خراونەتە دۆخی لەناکاوەوە، دوای لێکۆڵینەوە دەرکەوتووە ماددەکە کۆکایین بووە.
دەزگاکە رایگەیاندووە، پاودەرەکە لە بەشی رۆژئاوای کۆشکی سپی دۆزراوەتەوە و وەک مەترسییەک مامەڵەی لەگەڵدا کراوە و پێویستی بەوە هەبووە بە شێوەی کورتخایەن چۆڵبکرێت.
شیکاریی سەرەتایی بۆ ئەو ماددەیە لەلایەن بەڕێوەبەرایەتیی ئاگرکوژێنەوەی واشنتۆن دی سی ئەنجامدراوە، گەیشتووەتە ئەو ئەنجامەی کە پێدەچێت ماددەکە کۆکایین بێت و مەترسیی هێرشێکی دیاریکراو نییە.
دۆزینەوەی ئەو پاودەرە سپییە، قسە و باسی لە میدیاکانی ئەمریکای لەسەر ناسنامەی ئەو کەسەی لێکەوتەوە کە بەجێی هێشتووە.
جۆ بایدن و خێزانەکەی بە درێژایی کۆتایی هەفتە لە کۆشکی سپی دەرچوون و لە کۆشکی سپیدا نەبوون.
ئەنتۆنی گوگلیێلمی، وتەبێژی دەزگای نهێنی دەڵێت، “تازە پشتڕاستکراوەتەوە کە ئەو ماددەیەی دۆزراوەتەوە کۆکایینە و لێکۆڵینەوەکانمان بەردەوامن”.
بەپێی راپۆرتە میدیاییەکانی ئەمریکا، کۆکاین لە نهۆمی خوارەوەی بەشی رۆژئاوا دۆزراوەتەوە کە ئۆفیسی هێلکەیی و دامەزراوە سەرەکییەکانی دیکەی تێدایە.
راپۆرتەکان ئاماژەیان بەوە کردووە کە ئەو ماددەیە لە ناوچەیەک دۆزراوەتەوە کە ئەو گرووپانەی سەردانی شوێنی نیشتەجێبوونی سەرۆکایەتی دەکەن پێیان دەوترێت مۆبایلەکانیان بەجێبهێڵن بە هۆکاری ئەمنی.
کۆشکی سپی رایگەیاند کە لانیکەم بەڵگەی هەلومەرجی ئاماژە بەوە دەکات کە بەرپرسیارێتییەکە لە ئەستۆی سەردانکەرێکدایە، نەک لەسەر کەسێک کە پەیوەندی بە بنەماڵەی بایدنەوە هەبێت.
