ماوەی یەک هەفتەیە تاقیکردنەوە گشتییەکانی قۆناغی 12 ی ئامادەیی کۆتایی هاتووە و بڕیارە بەم نزیکانە ئەنجامەکان رابگەیەندرێت.
بەپێی زانیارییەکانی ئێستا، “گەر هیچ کێشەیەکی تەکنیکی دروست نەبێت، ئەمڕۆ دووشەممە ئەنجامی تاقیکردنەوەی ئەزموونە گشتییەکانی قۆناغی 12 ی ئامادەیی رادەگەیەندرێت”.
لەبارەی هەمان پرسەوە سامان سیوەیلی وتەبێژی وەزارەتی پەروەردە بە ئێستای راگەیاند، “تا ئێستا لیژنەی باڵای ئەزموونە گشتییەکان لەسەر راگەیاندنی ئەنجامەکان ئاگاداریان نەکردووینەتەوە، هەر کات ئێمەیان ئاگادارکردەوە ئێمەش لە رێگەی لاپەڕە فەرمییەکانمان خوێندکاران ئاگادار دەکەینەوە”.
ئەمساڵ 117 هەزار و 364 خوێندکار بەشداریان لە تاقیکردنەوەکانی قۆناغی 12 دا کردووە، لەو ژمارەیەش، 75 هەزار و 239 یان زانستیی بوون و 39 هەزار و 113 یان وێژەیی و سێ هەزار و 12ی دیکەشیان پیشەیی بوون.
