شەوی هەینی ئاگر لە سنووری گوندێكی قەراداغ كەوتەوە و پۆلیسی دارستان و ژینگەی سلێمانی دەڵێت، بەمەبەست بووە و چەندین ئامێر و پاتری لەو تاوانەدا بەکارهێنراوە.
بەڕێوەبەرایەتیی پۆلیسی دارستان و ژینگەی پارێزگای سلێمانی رایگەیاند، كاتژمێر 01:20 خولەكی شەوی 16ی ئەم مانگە لە سنووری گوندی هەرگێنەی سەر بە قەزای قەرەداغ، لە چوار شوێنی جیاواز لەماوەی نیو کاتژمێردا ئاگر لە دەغڵودان و پاوانی گوندەکە بەردرا.
دواتر مەفرەزەیەکی بەشی پۆلیسی دارستان و ژینگەی قەرەداغ گەیشتنە شوێنی رووداوەکە، بە هاوکاری هاوڵاتیانی گوندەکە و پۆلیسی بەرگریی شارستانیی قەرەداغ توانرا ئاگرەکە کۆنتڕۆڵبکرێت.
بەهۆی ئاگرەکەوە نزیکەی 10 دۆنم پوش، پاوان و دەغڵودانی هاوڵاتیان سووتا. پۆلیسی دارستان و ژینگە دەڵێت، “پاش کۆتاییهاتنی ئاگرەکە و گەڕان و لێکۆڵینەوەی وورد، دەرکەوت ئاگرەکان بەمەبەست بووە و چەندین ئامێر و پاتری لەو تاوانەدا بەکارهێنراوە”.
دەشڵێت، پەڕاوی لێکۆڵینەوەی بۆ کرایەوە و لێکۆڵینەوە و بەدواداچوون بەردەوامە بۆ دۆزینەوەی تۆمەتباران.
