بافڵ جەلال تاڵەبانی، سەرۆكی یەكێتیی نیشتمانیی كوردستان لە بارەگای مەكتەبی سیاسی لە هەولێر پێشوازی لە شاندێكی سەربازیی بەریتانیا بە سەرۆكایەتی مارشاڵ سامی سامپسۆن، گەورە راوێژكاری بەرگریی بەریتانیا لە رۆژهەڵاتی ناوەڕاست و باكووری ئەفریقا كرد.
لە كۆبوونەوەیەكدا كە دەرباز كۆسرەت رەسوڵ، كارگێڕی مەكتەبی سیاسی و لیوا روكن بەختیار محەمەد، ئەمینداری گشتیی وەزارەتی كاروباری پێشمەرگە و رۆزی كێڤ، كونسوڵی گشتیی بەریتانیا لە هەرێم ئامادەبوون، هەنگاوەكانی یەكخستنەوەی هێزی پێشمەرگە گفتوگۆی لەبارەوەكرا و جەخت لە فراوانكردنی هاوكاری و هەماهەنگییە سەربازییەكانی هاوپەیمانان و هێزی پێشمەرگە كرایەوە لەپێناو دروستكردنی هێزێكی نیشتمانیی تۆكمە و ئامادە بۆ رووبەڕووبوونەوەی مەترسییەكان.
سەرۆك بافڵ جەلال تاڵەبانی ستایشی هەوڵی بەردەوامی هێزەكانی هاوپەیمانانی كرد و بەڕێزەوە لەو قوربانییانەی رووانی كە لەپێناو پاراستنی سەقامگیری داویانە و رایگەیاند، “یەكێتیی نیشتمانیی كوردستان پابەندی هەموو ئەو لێكتێگەیشتن و رێككەوتنانەیە كە لەماوەی رابردوودا بۆ یەكخستنەوەی هێزی پێشمەرگە كراون، ناشمانەوێت بە بەرنامە و مەرامێكی تر ئەو لێكتێگەیشتنانە بە رێڕەوێكی هەڵەدا ببرێت و ئەم پرسە نیشتمانییە ببێتە قوربانیی بەرژەوەندییە حزبییەكان”.
سەرۆك بافڵ وتیشی، “یەكێتی سازش لە مافی پێشمەرگە و پێشخستنی تواناكانیان ناكات و لەهەمانكاتدا دەبێت پێشمەرگە لەخزمەت بەرژەوەندییە نیشتمانییەكاندا بێت و پارێزەری خاك، خەڵك و ئاڵاكەمان بێت”.
