ئەنجومەنی وەزیرانی هەرێم لە كۆبوونەوەی ئەمڕۆدا جەخت لەسەر رێککەوتنی نێوان حکومەتی هەرێم و حکومەتی فیدراڵ لەسەر بودجە دەکاتەوە و داواش لە فراکسیۆنە کوردستانییەکان دەکات شایستە داراییەکانی هەرێم بکەن.
ئەمڕۆ ئەنجومەنی وەزیرانی هەرێمی كوردستان بە سەرپەرشتی مەسرور بارزانی، سەرۆك وەزیران و قوباد تاڵەبانی، جێگری سەرۆك وەزیران كۆبووەوە.
لە بڕگەی یەکەمی کۆبوونەوەکەدا وەك ئەوەی لە راگەیەندراوەكەیدا هاتووە، سەرۆک وەزیران تیشکی خستەسەر دوا پێشهاتەکانی پرۆژەیاسای بودجەی گشتیی عێراق بۆ ساڵانی (2023-2025) و بابەتی هەوڵەکانی دەستپێکردنەوەی هەناردەکردنی نەوتی هەرێمی کوردستان لە چێوەی ئەو رێککەوتنەی لە نێوان حکومەتی هەرێم و حکومەتی فیدراڵ واژووکراوە.
ئەنجومەنی وەزیران پشتیوانی خۆی بۆ رێککەوتنەكە دووپاتکردەوە کە “دەرەنجامی گفتوگۆیەکی چڕ و لەسەر بنەمایەکی یاسایی و زانستیانە و دادپەروەرانە بووە، بۆیە داکۆکی لە دەستەبەرکردنی مافە دەستوورییەکان و شایستە داراییەکانی خەڵکی هەرێمی کوردستان دەکات”.
داواش لە گشت فراکسیۆنە کوردستانییەکان لە ئەنجومەنی نوێنەرانی عێراق دەکات کە بە هەماهەنگی و لەپێناوی یەکڕیزی، بەرگری لە مافە دەستووریی و شایستە داراییەکانی هەرێم لەناو پرۆژەیاسای بودجەی عێراقی فیدراڵ بکەن.
لە بڕگەی دووەمدا، ساسان عەونی وەزیری شارەوانی و گەشتوگوزار، راپۆرتێکی لەبارەی داڕشتنی کۆدی بیناسازی لە سەرتاسەری هەرێمی کوردستان و رێنمایی نوێی وەزارەتەكەی بۆ پلانسازی و تۆمارکردنی ئەلکترۆنی موڵک و ماڵی دەوڵەت لە هەرێمی کوردستان خستەڕوو.
وەزیری شارەوانی ئاماژەیدا بە رێکخستنەوەی رەوشی بیناسازیی لە هەرێم لە رێگای داڕشتنەوەی کۆدی بیناسازی و نوێکردنەوەی پرۆسەی رێپێدانی بیناكردن بە ئاراستەی کۆنتڕۆڵکردنی شێواوی لە ژینگەی بیناسازی و رێگرتن لە سەرپێچی و زامنکردنی سەلامەتی لە ئاگرکەوتنەوە و سەلامەتی دامەزراوەی کارەبایی و میکانیکیی ناو بینا و باڵەخانەکان و سەلامەتیی پێکهاتە و کارامەیی لە ووزە و هەنگاونان بۆ بە ئەلکترۆنیکردنی پرۆسە و رێکاری رێپێدانیی بینا.
لە بڕگەی سێیەمدا رێبەر ئەحمەد، وەزیری ناوخۆ، کورتەیەکی دەربارەی جێبەجێکردنی بڕیارەکانی پێشووی ئەنجومەنی وەزیران سەبارەت بە دیاردەکانی سیم کارتی بێخاوەن، ئۆتۆمبێلی بێبەرایی و تۆمارنەکراو و چەکی بێمۆڵەت و هەنگاوەکانی وەزارەتەكەی بۆ جێبەجێکردنی ئەو بڕیارانە خستەڕوو، ئاماژەی بە بەرەوپێشچوون و گرفت و بەربەستەکان دا، هەروەها باسی لە هەماهەنگی هاوڵاتیان لەمبارەیەوە کرد و ئەوەشی خستەڕوو کە لە ناوەڕاستی مانگی تەمموز، وادەی دیاریکراو بۆ تۆمارکردنی چەکی تۆمارنەکراو کۆتایی دێت و لەو کاتە بەدواوە، بە گوێرەی یاسای نوێی چەک لە هەرێمی کوردستان، رێکاری پێویست دەگیرێتەبەر، ئەنجومەنی وەزیران وەزارەتی ناوخۆی راسپارد کە بەردەوام بن لە رێکارەکانیان بۆ بەرگرتن لەو دیاردانە و کارکردن بۆ کەمکردنەوەی تاوان و توندوتیژیی و پاراستنی ژیان و سەلامەتی هاوڵاتیان.
لە كۆتایشیدا هەریەك لە دانا عەبدولکەریم، وەزیری ئاوەدانکردنەوە و نیشتەجێکردن و وەزیری ناوخۆ، باسیان لە بابەتی دەستنیشانکردنی قەدەغەکراویی رێگە گشتییەکان لە دەرەوەی شارەکان و بەرگرتن و لابردنی زیادەڕەوییەکان لەبەر رۆشنایی یاسای رێگە گشتییەکان لە هەرێمی کوردستان کرد.
لە دوای گفتوگۆ و راگۆڕینەوە، ئەنجومەنی وەزیران بڕیاری راسپاردنی هەردوو وەزارەتی ئاوەدانکردنەوە و نیشتەجێکردن و ناوخۆی دا کە بەردەوام بن لە رێکارە هاوبەشەکانیان و پێویستە سەرۆکی یەکە کارگێڕیەکانیش لە سنووری پارێزگا و ئیدارەی سەربەخۆ و قەزا و ناحییەکانیان، چالاکانەتر کاربکەن بۆ لابردنی هەر زیادەڕەوییەک لەسەر رێگاوبانە گشتیەکان و بەرگرتن لەهەر هەوڵێکی زیادەڕۆیی و رووبەڕووکردنەوەی سەرپێچیکاران لە بەرامبەر یاسا و وەرگرتنی رێکاریی قەزايی بەرامبەریان.
