دژی بڕیاری گواستنەوەی شوێنی شووتی فرۆشانی هەولێر بۆ عەلوەی نوێ، ئەمڕۆ جارێكی دیكە كاسبكاران خۆپیشاندانیان ئەنجامدا و رێگایەكی سەرەكییان داخست.
بەیانیی ئەمڕۆ جوتیار و كاسبكارانی شووتی فرۆش گردبوونەوەی ناڕەزایەتییان لە نزیك گومرگی كۆن و لەسەر شەقامی سەرەكیی هەولێر- موسڵ ئەنجامدا.
دەربارەی هۆكاری ئەنجامدانەوەی خۆپیشاندان بەشداربوویەكی گردبوونەوەكە بە تۆڕی میدیایی ئێستای راگەیاند، كەس بە دەنگمانەوە نەهات و هیچ بەڵێنێكیشمان پێنەدراوە.
بەشداربوویەكی دیكە وتی، “دوێنێ بەڵێنێكیان دا، وتیان چۆڵی بكەن، گوایە دەرگای گۆڕەپانەكەمان بۆ دەكەنەوە، دەرگاكەیان كردەوە، بەڵام دایانخستەوە”.
چەندین ساڵە گۆڕەپانی گومرگی كۆن لەلایەن كاسبكاران و جوتیارانەوە بۆ شووتی فرۆشتن بەكاردەهێنرێت، ئەوان كرێ و باج دەدەنە حكومەت، بەڵام دوای كردنەوەی عەلوەی نوێ بڕیاردراوە شوێنەكەیان بۆ ئەوێ بگوازرێتەوە.
كاسبكاران دەڵێن، شوێنی ئیشكردنەكە لە حكومییەوە دەبێتە ئەهلی، جگە لەوەی شوێنەكە بچووكە و بەكەڵكیان نایەت.
