د. لەتیف رەشید سەرۆك كۆماری عێراق، داوادەكات گرنگی بە كەسوكاری شەهیدان و ئەنفالكراوان بدرێت و پەیوەندیی نێوان حكومەتی هەرێمی كوردستان و حكومەتی فیدراڵی بەهێزبكرێت.
سەرۆكایەتیی كۆماری عێراق بڵاویكردەوە، ئەمڕۆ چوارشەممە د. لەتیف رەشید سەرۆك كۆماری عێراق، پێشوازیكردووە لە شاندێكی یەكێتیی نیشتمانیی كوردستان و لەبارەی دۆخی هەرێمی كوردستانەوە گفتوگۆیان كردووە.
شاندەكە دوای گەڕانەوەیان لە گرتووخانەی نوگرە سەلمان سەردانی سەرۆك كۆماریان كردووە و بەپێی راگەیەندراوی كۆبوونەوەكە، د. لەتیف رەشید داوایكردووە گرنگی بدرێت بە خانەوادە و كەسوكاری شەهیدان و ئەنفالكراوان و پێویستییەكانیان دەستەبەربكرێن و رووفاتی ئەنفالكراوان بگەڕێندرێنەوە بۆ زێدی خۆیان.
لە كۆبوونەوەكەدا سەرۆك كۆمار بە پێویستی زانیوە “پەنا بۆ بنەمای گفتوگۆی بونیادنەرانە ببرێت و پەیوەندیی نێوان حكومەتی هەرێمی كوردستان و حكومەتی فیدراڵی بەهێزبكرێت، بۆ ئەوەی یارمەتیدەربێت لە سەقامگیركردنی بارودۆخی ئابوری و ئاسایشی هاوڵاتییان”.
