بەڕێوەبەرایەتیی حەج و عەمرەی هەرێمی کوردستان تێچووی پرۆسەی حەجی بۆ هەر حاجییەک دیاریکرد و رایگەیاند وەزارەتی ئەوقاف بە بڕی 330 هەزار دۆلار پاڵپشتی پرۆسەی حەجی ئەمساڵ دەکات.
لە ئاگادارییەکدا بەڕێوەبەرایەتیی گشتیی حەج و عەمرەی هەرێمی کوردستان حاجییان ئاگاداردەکاتەوە، هەر کەسێک ئەمساڵ مافی گەشتکردنیان هەیە بۆ حەج لە رۆژی سێشەممە 2/5/2023 سەردانی نوسینگەی حەج و عەمرەی پارێزگا و ئیدارە سەربەخۆکان بکەن.
لە ئاگادارییەکەی وەزارەتی ئەوقافدا ئاماژە بۆ ئەوەکراوە کە حاجیان سەردانی بەڕێوەبەرایەتییەکانی حەج و عەمرە بکەن بەمەبەستی تەواوکردنی مامەڵەکانیان.
بەپێی بەڕێوەبەرایەتیی گشتیی حەج و عەمرەی هەرێمی کوردستان، تێچووی حەجی هەر حاجییەک بۆ گەشتی ئاسمانی چوار هەزار و 500 دۆلارە.
دوا وادەی دانانی ئەو بڕە پارەیەشی 10/5/2023 دەبێت.
