بەهۆی زریان و گێژەڵووكەوە، 11 كەس لە باشووری ئەمریكا گیانیان لەدەستدا، دەیان ملیۆن كەسیش لە دۆخێكی ناسەقامگیردان.
ئەو شەپۆلی زریان و گێژەڵووكەیە ویلایەتەكانی ئەركنساس، ئێلینۆی و ئەیوای گرتووەتەوە، 11 كەس بوونەتە قوربانی و دەیان كەسی تر برینداربوون، لە ویلایەتی میزۆری باری نائاسایی راگەیەندراوە و 90 ملیۆن كەس لە باشووری ئەمریكا لە بەردەم مەترسیدان، وەك میدیای وڵاتەكە بڵاویكردووەتەوە.
جگە لە زیانە گیانییەكان، زریان و گێژەڵووكە و هەورەبروسكەی بەهێز بوونەتەهۆی رووخاندنی چەندین خانوو، شكان و لەتبوونی دەیان درەخت و وەرگەڕانی ژمارەیەكی زۆری ئۆتۆمبێل، سارا هاكابی فەرمانڕەوای ویلایەتی ئەركنساس بەو شێوەیە ئامارەكانی لە كۆنگرەیەكی رۆژنامەوانیدا خستەڕوو و فرانك سكۆت سەرۆكی شارەوانیی لیتڵ رۆك یەكێك لەو شارانەی سەر بە ویلایەتەكە كە زۆرترین زیانیان بەركەوتووە دەڵێت، “خەڵكێكی زۆر ئاوارەبوون و بەدوای پەناگەدا دەگەڕێن”.
