لە پەیامێکدا بەبۆنەی جەژنی ئەکیتۆی ساڵی نوێی ئاشوورییەکانەوە قوباد تاڵەبانی جێگری سەرۆک وەزیرانی هەرێمی کوردستان، پیرۆزبایی ئەو جەژنە لە ئاشوورییەکان دەکات و جەخت لە بەردەوامیی پێکەوەژیانی هەموو نەتەوە و ئایینە جیاوازەکان.
قوباد تاڵەبانی لە پەیامەکەیدا رایگەیاندووە، “بەبۆنەی جەژنی ئەکیتۆ و سەری ساڵی نوێی بابلی ئاشوورییەوە، پیرۆزباییەکی گەرم ئاراستەی گەلانی کلدانی، ئاشووری و سریانی لە کوردستان و عێراق و هەموو جیهان دەکەم، هیوای ساڵێکی پڕ لە ئاشتی و ئارامی بۆ هەموو لایەک دەخوازم”.
لە پەیامەکەی جێگری سەرۆک وەزیراندا هاتووە، “کوردستان شانازی بەوەوە دەکات کە پێکەوەژیانی ئاشتییانەی نێوان پێکهاتە نەتەوەیی و ئایینییە جیاوازەکانی تێدا بەرجەستە بووە، بەم مێژووە پرشنگدارەوە بە دڵنیاییشەوە لە داهاتووشدا بەم جۆرە بەردەوام دەبێت”.
راشیگەیاندووە، “لەم قۆناغەدا ئەرکی هەموو لایەکمانە ئەم کلتور و رۆحی پێکەوەژیانە زیاتر پەرە پێ بدەین و پێکەوە بەرەو ئایندەیەکی گەشتر هەنگاوبنێین”.
