بەڕێوەبەرایەتیی کارەبای سلێمانی رایگەیاند، پڕۆژەیەکی گرنگ بۆ کەمکردنەوەی بارگرانیی سەر هێڵ و وێستگەکان جێبەجێدەکات و خەرجیی پڕۆژەکەش 700 ملیۆن دینارە.
لە راگەیەندراوێکدا بەڕێوەبەرایەتیی گشتیی کارەبای سلێمانی ئاشکرایکرد، بەسەرپەرشتیی بەڕێوەبەرایەتیی گواستنەوەی وزەی کارەبای سلێمانی و لەسەر بودجەی داهاتی (8%)ی کارەبا، بە بڕى نزیکەی (700) ملیۆن دینار پڕۆژه‌یه‌كی كاره‌با له سلێمانی جێبه‌جێده‌كرێت.
بەپێی راگەیەندراوەکە، پڕۆژه‌كه‌ش لە چەند بەشێک پێکهاتووە کە بریتیین له گۆڕینی بەشێک لە هێڵی 33 کەی ڤی قولەڕەیسی – مۆبایلی هەڵگورد و گۆڕینی بەشێک لە هێڵی 33 کەی ڤی تانجەرۆ – باشوور و گۆڕینی رێڕەوی هێڵی 33 کەی ڤی شارباژێڕ – سیتەک و هەروەها ڕاکێشانی هێڵێکی 33 کەی ڤی لەنێوان وێستگەی بەردەکە و وێستگەی تاڤگە، هەروەها دانانی تاوەرێکی جۆری DCS بۆ مۆبایلی سەیدسادق.
پڕۆژەکەش لە قۆناغی کۆتاییدایە و بە تەواوبوونی سوودێکی زۆری دەبێت بۆ کەمکردنەوەی بارگرانی لەسەر هێڵەکان و وێستگەکان.
