وتەبێژی ئەنجومەنی كۆمسیۆنی باڵای سەربەخۆی هەڵبژاردنەكان و ڕاپرسی لە هەرێمی كوردستان رایدەگەیەنێت، “ئەگەر داوابكرێت ئەمساڵ هەڵبژاردن لە هەرێمی كوردستان ئەنجامبدرێت شەش مانگمان پێویستە و دەشڵێت، دەبێت لایەنەكان لەسەر شێوازی بەڕێوەچوونی هەڵبژاردنەكان و هەمواركردنەوەی یاساكە رێكبكەون”.
شیروان زرار وتەبێژی ئەنجومەنی كۆمسیۆنی باڵای سەربەخۆی هەڵبژاردنەكان و ڕاپرسی لە هەرێمی كوردستان لە لێدوانێكدا بە تۆڕی میدیایی ئێستای ڕاگەیاند، ئەگەر لایەنەكان بیانەوێت هەڵبژاردن لە ئەمساڵدا ئەنجامبدرێت دەبێت لەسەر كاتی هەڵبژاردن رێكبكەون و لە پەرلەمانی كوردستانەوە بڕیار لەسەر كاراكردنەوەی كۆمسیۆن و دووبارە متمانەی بدرێت و لە هەمانكاتدا لەسەر شێوازی بەڕێوەچوونی هەڵبژاردن كە ئەگەر گۆڕانكاری تێدا بكرێت رێككەوتن بكرێت و یاسای هەڵبژاردنەكانیش هەمواربكرێتەوە.
راشیگەیاند، كۆمسیۆن پێویستی بە بودجەیەكە كە پڕۆسەكە ئەنجامبدات و دەبێت بە مەرسوومێك لەلایەن سەرۆكایەتیی هەرێمی كوردستانەوە كاتی ئەنجامدانی هەڵبژاردن دیاربكرێت.
بە وتەی بەرپرسەكەی كۆمسیۆن، دەبێت لایەنەكان تا كۆتایی مانگی نیسانی ئەمساڵ بگەنە رێككەوتن و كۆمسیۆنیش پێویستی بە شەش مانگ هەیە تا ئامادەكارییەكانی ئەنجامبدات و بتوانرێت لە كۆتایی ئەمساڵدا هەڵبژاردن لە هەرێمی كوردستان بەڕێوەبچێت.
