خولی ئەمریکا شێوازێکی دارایی نوێی بۆ واژۆکردنی گرێبەست لەگەڵ لیۆ مێسی ئەفسانەی ئەرجەنتین داهێناوە، تاوەکو ئێستا لە بواری تۆپی پێ و وەرزش-دا ڕووینەداوە.
بەپێی زانیارییەکانی “سپۆرتس کیدا”، یانەکانی خولی نایابی ئەمریکا (MLS) لە دوایین کۆبوونەوەیان سەبارەت بە کەیسی مێسی و بەهێزکردنی خولەکە لەڕووی داراییەوە، بڕیاریانداوە بە کۆمەڵ هەوڵی گواستنەوەی یاریزانەکەی ئەرجەنتین بدەن.
سەرجەم یانەکانی ئەمریکا بەشداردەبن لە تەرخانکردنی مووچە خەیاڵییەکەی مێسی، واتا هەریەکە و بەشێکی مووچەکەی دەدەن، بەم ڕێگەیە تەواوی خواستەکانی جێبەجێدەبێت و هیچ لادانێک لەڕووی داراییەوە ڕوونادات.
لەوەش سەیرتر، مێسی بە ناوی یانەی ئینتەر مەیامی-یەوە ناونووس دەکرێت، بەڵام بۆی دەبێت لە هەر یانە و ویلایەتێکی دیکەی ئەمریکا یاریبکات.
ئەمریکییەکان پێیانوایە، بوونی مێسی لە خولی وڵاتەکەیاندا دۆسیەکەیان بۆ مۆندیالی 2026 بەهێز دەکات، لەڕووی داراییشەوە قازانجێکی زۆر زیاتر بۆ دەستەبەردەکات کە سەرجەم یانەکان سوودمەند دەبن لێی.
