بەڕێوەبەرایەتیی کەشناسیی و بومەلەرزەزانیی هەرێم بڵاویکردەوە، لە شەوی سێشەممەوە کەشوهەوا لە زۆرینەی ناوچەکانی هەرێم جێگیربوون بە خۆیانەوە دەبینن.
بەڕێوەبەرایەتیی کەشناسیی وبومەلەرزەزانیی هەرێم بڵاویکردەوە، “ئەمڕۆ دووشەممە ئاسمان بە درێژایی کاتەکان هەوری باراناوی دەبێت لە تەواوی ناوچەکانی هەرێم و لەکاتەکانی دوای نیوەڕۆ دابارین بۆ شێوەی تاوە باران و بروسکە دەگۆڕێت، پاشان بۆ ئێوارە کاریگەریەکەی لە زۆربەی شوێنەکان کەمدەبێتەوە بۆ شێوەی نمە بارانی پچرپچر لە ناوچە شاخاوییەکانی رۆژهەڵاتی هەرێم”.
ئاشکراشیکرد، “سبەینێ سێشەممە ئاسمان هەور دەبێت پاشان بۆ نیمچە هەور دەگۆرێت، لە کاتەکانی نیوەڕۆ تاکوو ئێوارە ئەگەری دابارینی نمە بارانی کەم هەیە لە ناوچەشاخاوییەکان و بە رێژەی زیاتر لە ناوچەکانی رۆژهەڵاتی هەرێم و لەکاتەکانی شەودا کەش لەزۆربەی ناوچەکان جێگیر دەبێتەوە”.
لای خۆیەوە ئاسۆ کەمال بەڕێوەبەری کەشناسیی هەرێم بە تۆڕی میدیایی ئێستای راگەیاند، “لە سنوور پارێزگای سلێمانی تا ئەمڕۆ 575 ملم بارانباریوە، لە کاتێکدا ساڵی پار لە هەمان کاتدا تەنها 360 ملم باریبوو”.
