کەشناسیی هەرێمی کوردستان دۆخی کەشوهەوای ئەمڕۆ و سبەینێی ناوچە جیاوازەکانی هەرێمی کوردستانی بڵاوکردەوە، بەپێی پێشبینییەکان نمەباران دەبارێت، پلەکانی گەرما نزمدەبنەوە، خێرایی با زیاتر دەبێت و تۆز و خۆڵیش دەبێت.
بەڕێوەبەرایەتیی گشتیی کەشناسیی هەرێمی کوردستان بڵاویکردەوە، ئەمڕۆ دووشەممە ئاسمان نیمچەهەور و هەوری تەواو دەبێت، لەگەڵ دابارینی نمەباران لە ناوچە شاخاوییە بەرزەکان، هەروەها تاوە باران و هەورە تریشقە لە زۆربەی ناوچەکانی رۆژهەڵاتی هەرێم (ناوچەکانی پارێزگای سلێمانی و هەڵەبجە و باکوری رۆژهەڵاتی شاری هەولێر).
ئاماژە بەوەشکراوە کە ئەمڕۆ بەهۆی زیادبوونی خێرایی با-وە تۆز و خۆڵ دەبێت، لە ئێوارەدا کاریگەریی تۆز و خۆڵەکە کەمدەبێتەوە، پلەکانی گەرما 2 بۆ 3 پلە نزمدەبێتەوە.
هەروەها سبەینێ سێشەممە ئاسمان هەور و نیمچەهەور دەبێت، لەگەڵ بارینی نمەباران لە ناوچە شاخاوییەکانی باکوری رۆژهەڵاتی هەرێم و لە ناوچەکانی رۆژهەڵاتی هەرێم بەشێوەی تاوەباران و هەورە بروسکە دەبێت، لە کاتەکانی دوایی نیوەڕۆ دابارین دەوەستێ و کەشە جێگیر دەبێتەوە.
کەشناسی دەڵێت، نزمبوونەوەى پلەکانى گەرما لە سنوورى پارێزگاى سلێمانى زیاتر دەبێت و ئەگەرى بارینى تەرزە لە هەندێک ناوچەى سنوورى پارێزگاى سلێمانى هەیە.
پلەکانی گەرماش 2 بۆ 4 پلە دادەبەزن.
