حکومەتی تورکیا دەستی بە دروستکردنی یەکەی نیشتەجێبوون بۆ ژمارەیەک لەو هاوڵاتییانەی وڵاتەکەی کردووە کە لە بومەلەرزەکەی شەشی ئەم مانگەدا بێ ماڵ و حاڵ بوون پەلەکردن لە بڕیارەکەشدا ناڕەزایەتیی شارەزایانی بواری بیناسازی لێکەوتووەتەوە.
موراد کۆرۆم وەزیری ژینگە و گەشەپێدانی تورکیا بڵاویکردوە، “دەستمان بە دروستکردنی 855 خانوو لە نورداچ و ئیسلاح کردووە، هەوڵەکانمان دەخەینە کار بە زووترین کات خانوو بۆ لێقەوماوانی بومەلەرزەکە دروستبکەینەوە”.
لای خۆیانەوە ژووری ئەندازیاران و تەلارسازانی تورکیا رایانگەیاند، “ئەم پرۆژەیە بەبێ دووبارە ئەنجامدانەوەی پشکنینی جیۆلۆجی دەستیپێکراوە، ئەمەش گواستنەوەی مەترسی بومەلەرزەیە لە ئێستاوە بۆ داهاتوو و ژیانی خەڵکێکی زۆر دەخاتە مەترسییەوە”.
هەفتەی رابردوو رەجەب تەیب ئەرۆگان سەرۆکی وڵاتەکە بڕیاریدا لە زووترین کاتدا دەست بە بونیادنانەوەی شوێنە زیانلێکەوتووەکان بکەنەوە، ئەمەش لەکاتێکدایە بڕیارە لە 14 ی ئایاری ئەمساڵ هەڵبژاردن لە وڵاتەکەدا ئەنجامبدرێت.
