وتەبێژی حكومەتی عێراق رایدەگەیەنێت، بڵاوكردنەوەی بابەتەكەی رۆژنامەی (سەباح) بۆچوونی كەسییە و گوزارشت لە بۆچوونی فەرمیی حكومەتی عێراق ناكات.
رۆژنامەی سەباحی نیمچە فەرمی بابەتێكی بەناونیشانی ئایا هەرێمی كوردستان هەڵدەوەشێتەوە؟.. بڵاوكردەوە و ئەوەش كاردانەوەی لێكەوتەوە و هەر ئەمڕۆ فەرمانگەی میدیا و زانیاریی حكومەتی هەرێم روونكردنەوەیەكی بڵاوكردەوە و رایگەیاند، “هەرێمی كوردستان، خاوەن قەوارەیەكی یاسایی و دەستوورییە و بەرهەمی خوێنی هەزاران شەهید و خۆڕاگری پێشمەرگە قارەمانەكانە و هیچ دەسەڵاتێك توانای هەڵوەشاندنەوەی هەرێمی كوردستانی نییە و بە نووسینی ڕۆژنامەیەكی مایەپووچ هەڵناوەشێتەوە”.
باسم عەوادی وتەبێژی حكومەتی عێراق رایگەیاند، ئەو بابەتەی كە لە رۆژنامەی (سەباح)دا بڵاوكراوەتەوە، بۆچوونی كەسییە و گوزارشت لە بۆچوونی فەرمیی حكومەتی عێراق ناكات و بە پشت بەستن بە بڕگەكانی دەستوور پەیوەندییەكانی نێوان حكومەتی عێراق و هەرێمی كوردستان رێكخراون.
