وەزارەتی ئاوەدانكردنەوەی هەرێم رایدەگەیەنێت، كاركردن لە پڕۆژەی رێگای دووسایدی دەربەندیخان-كەلار دەستیپێكردەوە و مانگانە بڕی یەك ملیار دینار بۆ كۆمپانیای جێبەجێكاری پڕۆژەكە تەرخاندەكرێت.
بەپێی راگەیەندراوێكی وەزارەتی ئاوەدانكردنەوە و نیشتەجێكردن كە وێنەیەكی دەست تۆڕی میدیایی ئێستا كەوتووە و تێیدا هاتووە،”كاركردن لەپڕۆژەی رێگای دووسایدی دەربەندیخان-كەلار دەستیپێكردووەتەوە ئەوەش دوای ئەوەی بڕیاردرا مانگانە بڕی یەك ملیار دینار بە شێوەی چوار سولفە بۆ كۆمپانیای جێبەجێكاری پڕۆژەكە خەرجبكرێت”.
لە راگەیەندراوەكەدا هاتووە، “لە ئێستادا كار لە بڕگەكانی قیرتاوكردن و تێكەڵەرێژكردن و ژمارەیەك لە پرد و ئاوبەرەكانی پڕۆژەی رێگای دووسایدی دەربەندیخان-كەلاردا دەكرێت و رێژەی ئەنجامدراویش گەیشتووەتە نزیكەی 58٪”.
ئاماژە بۆ ئەوەش كراوە، لەبارەی پڕۆژەی دووسایدی (دەربەندیخان-زەڕایەن)، لایەنە پەیوەندیدارەكان راسپێردران كە كێشەكانی كۆمپانیای جێبەجێكار چارەسەربكەن و دوای وردبینی لە كارەكانی و دۆسیەكانی، مانگانە پێشینەی بۆ خەرجدەكرێت.
