کەمێک بەر لە ئێستا منداڵێکی ونبووی کیمیابارانکردنی هەڵەبجە دۆسیەکەی لە دادگا یەکلایی کرایەوە و سەلمێندرا منداڵی هەڵەبجەیە.
یەکێک لە منداڵە ونبووەکانی کیمیابارانی هەڵەبجە لە ساڵی 1988 ئەمڕۆ دوای یەکلاییبوونەوەی دۆسیەکەی لە دادگا، بڕیار لەسەر خێزانەکەی درا و یەکلاییکرایەوە کە منداڵی ئەو خێزانە و خەڵکی هەڵەبجەیە.
ئەو گەنجە ناوی “هاوڕێ ئەنوەر”ـە و دادگا بڕیاری لەسەر ئەوە داوە کە منداڵی باوکێکە بەناوی مەحمود فەتاح، هەرچەندە پارێزەری دۆسیەکە دەڵێت بڕیارەکەی دادگا کۆتا بڕیار نییە و دەتوانرێت تانەی لێبدرێت بۆ پێداچوونەوە.
لەلایەکی دیکەوە مەحمود فەتاح کە دادگا وە “باوکی ئەو گەنجە” بڕیاری لەبارەوە داوە، رەتیدەکاتەوە ئەوە منداڵی ئەو بێت و دەڵێت، “پێشتر لە پشکنینی DNA لە سلێمانی ئەوە یەکلایی کراوەتەوە کە منداڵی من نییە و هیچ پەیوەندییەکمان بەیەکەوە نییە”.
وتیشی، “من منداڵەکەی خۆمم لە کاتی کیمیابارانەکەدا لە هەڵەبجە بەخاکسپاردووە بە دەستی خۆم و منداڵەکەی من مردووە”.
جەختیکردەوە کە تانە لە بڕیارەکەی دادگا دەدات وتی، “سەد جاری تریش بڕیاری لەسەر بدرێت هەر تانەی لێدەدەم”.
