وتەبێژی کۆمسیۆنی باڵای هەڵبژاردنەکان رایگەیاند، بەهۆکاری هونەری و یاسایی بڕیاردراوە دەرگای کشانەوەی کاندیدانی هەڵبژاردنی پەرلەمانی کوردستان نەکرێتەوە.
جومانە غەلای رایگەیاند، لە ئێستادا کۆمسیۆنی باڵای هەڵبژاردنەکان سەرقاڵی پێداچوونەوەیە بە داتا و زانیارییەکانی کاندیدەکانی هەڵبژاردنی پەرلەمانی کوردستان لەبەر چەند هۆکارێکی هونەری و یاسایی لە ئێستادا دەرگای کشانەوە بەڕووی کاندیدەکاندا داخراوە.
ئاشکراشیکرد، لیژنەیەکی تایبەت بە بەدواداچوونی پێشلکاری و سەرپێچییەکانی کاندیدەکان پێکهێنراوە، هەر کاندیدێک لە دەرەوەی رێککارە یاساییەکان کاربکات لێپێچینەوەی لەگەڵدا دەکرێت.
هاوکات سەبارەت بە داتاکانی وەرگرتنەوەی کارتی بایۆمەتریی دەنگدان جومانە غەلای ئاشکرایکرد، تا ئێستا دوو ملیۆن و 685 هەزار و 466 کارت وەرگیراونەتەوە و 214 هەزار و 112 کارت ماون وەربگیرێنەوە.
داوایشیکرد، ئەو هاوڵاتییانەی تا ئێستا کارتی بایۆمەتریی دەنگدانیان وەرنەگرتووەتەوە سەردانی بنکەکانی دەنگدان بکەن بە مەبەستی وەرگرتنەوەی تا لە مافی دەنگدان بێبەش نەبن.
