شارەزایەکی بواری کەشناسی ڕایدەگەیەنێت، کەشوهەوای مانگی ئایار هاوشێوەی مانگی نیسان باراناوی دەبێت و پێشبینی سەرڕێژبوونی بەنداوی دوکان دەکرێت.
هەڤاڵ سدیق، شارەزای بواری کەشناسی ڕایگەیاند، بەگوێرەی پێشبینییەکان، کەشوهەوای مانگی ئایار هاوشێوەی کەشوهەوای مانگی نیسان باراناوی دەبێت، هەروەها پێشبینیدەکرێت هەر لە مانگی ئایاردا بەنداوی دوکان سەرڕێژببێت.
وتیشی، لە سەرەتای هەفتەی داهاتوو، لە ڕۆژانی یەکشەممە، دووشەممە، واتا چەند ڕۆژێکی کۆتایی مانگی نیسان باراناوی دەبێت، شەپۆلێکی تری بارانبارینی بەهاریی مامناوەند بۆ بەهێز، سەرجەم ناوچە جیاجیاکانی هەرێمی کوردستان دەگرێتەوە، لەگەڵیشیدا تاوەبارانی بەلێزمە، هەورەبروسکە و تەرزەشی لەگەڵدایە، ئەگەری بەرزبوونەوەی ئاستی ئاویش هەیە لە بەشێک لە ناوچەکانی هەرێمی کوردستان.
