چەند كەسایەتییەكی باڵەكایەتی لە ڕاگەیەندراوێكدا، داوای ئازادكردنی ئەو كەسانە دەكەن كە لە چەند ڕۆژی ڕابردوودا لەلایەن ئاسایشەوە دەستگیركراون.
ئەمڕۆ شەممە 12ی كانونی یەكەم، لە ڕاگەیەندراوێكدا كە بەناوی چالاكوانان و ژمارەیەك كەسایەتیی باڵەكایەتی بڵاوكراوەتەوە ئاماژە بەوەكراوە، “چەند ڕۆژێکە پۆلێک گەنج لە ناحیەى قەسرێ لەلایەن ئاسایشى ناحیەکەوە دەستگیرکراون، ئەمڕۆش ڕۆژنامەنوس و چالاکى کۆمەڵى مەدەنى و ژینگەپارێز و شاخەوان ‘زۆسک باڵەک’ لەلایەن ئاسایشى قەزاى چۆمانەوە دەستگیرکرا، کە سەرجەمیان لە زیندانى ئاسایشى گشتیى قەزاى سۆرانن”.
لەو ڕاگەیەندراوەدا ئەوەش خراوەتەڕوو، “ئێمە وەک چالاکوانان و گەنجان و بەشێک لە کەسایەتییە ئاینى و کۆمەڵایەتییەکانى باڵەکایەتى لە ڕێگەى ئەم بەیاننامەیەوە ڕایدەگەیەنین، تا کاتژمێر 3ى دواى نیوەڕۆى ڕۆژى یەکشەممە 13/12/2020 چاوەڕوانى ئازادکردنى سەرجەم ڕۆڵەکانمان دەکەین، بەپێچەوانەوە لەدواى ئەو کاتەى دیاریمان کردووە دەست دەکەین بە ئەنجامدانى چالاکی مەدەنى و شارستانى و هەموو فشارێک دەکەین بۆ ئازادکردنى گەنجەکانمان”.
ئەوەش خراوەتەڕوو، “لە ئەگەرى ئازاد نەکردنیان سبەى کاتژمێر 3ى دواى نیوەڕۆ چالاکوانانى باڵەکایەتى لەبەردەم بازاڕى هاوچەرخ نزیک مزگەوتى ناوبازاڕى چۆمان کۆدەبنەوە و بەیاننامەیەکى ناڕەزایى دەخوێندرێتەوە، داواش لە سەرجەم ئازادیخواز و چالاکوان و گەنجان و سەرجەم چین و توێژەکانى باڵەکایەتى دەکەین بەشدارى بکەن و پێکەوە ئازادى تاک و ئازادى گشتیی ناوچەکەمان بپارێزین”.
وێنەی ئەو كەسانەی لەلایەن ئاسایشەوە لە باڵەكایەتی دەستگیر كراون..
