قۆناغی چوارەمی هەڵمەتی نیشتمانیی چاندنی یەك ملیۆن نەمام لەسەر بڕیار و راسپاردەی بافڵ جەلال تاڵەبانی سەرۆكی یەكێتیی نیشتمانیی كوردستان لەچوارچێوەی پڕۆژەی ئاشتكردنەوەی سلێمانی و سەوزكردنی كوردستان، گەیشتە سنووری خەلەكان.
ئەمڕۆ چوارشەممە لە سنووری هۆبەی دارستان و پاوانی خەلەكان هەڵمەتی چاندنی یەك ملیۆن نەمام لە دارستانەكانی ناوچەكە دەستیپێكرد.
هەر لەو بارەیەوە، هاوكار جەلال بەڕێوەبەری دارستان و پاوانی سلێمانی لە لێدوانێكدا بۆ كەناڵەكانی راگەیاندن ئاماژەی بۆ ئەوە كرد، لە چەند رۆژی ڕابردوودا ئامادەكاریی و رێوشوێنەكانی چاندنی نەمام لە دارستانی خەلەكان دەستیپێكرد و دوای تەواوبوونی رێكارە زانستییەكان ئەمڕۆ هەنگاوی یەكەم لە هەڵمەتەكەمان راگەیاند و دەستمانكرد بە چاندنی نەمامەكان.
ئاشكراشیكرد، چەندین تیم لە سنووری هۆبە و پڕۆژە دارستانییەكانی سەر بە بەڕێوەبەرایەتییمان لە شار و شارۆچكەكانی تر بەردەوامن لە كاركردن و لە ئامادەكاریدان تا هەنگاو بەهەنگاو كوردستانەكەمان سەوزتر و جوانتربكەین كە خەم و پەرۆشيی سەرۆك بافڵ جەلال تاڵەبانیش هەر لەو پێناوەدایە تا دارستانەكان بەرفراوانتر و ژینگەكەمان جوانتربكەین و جگە لە سەوزكردن بە هەمووان هەوڵی پاراستنی ئەو دارستانانەش بدەین كە هەن.
