ئەمڕۆ ئەنجومەنی وەزیرانی هەرێم کۆدەبێتەوە و جگە لە پرسی دواکەوتنی مووچەی مووچەخۆرانی هەرێم پرسی خانەنشینی و دەستەبەری كۆمەڵایەتیی كرێكاران لە هەرێمی كوردستان تاووتوێدەکرێت.
فەرمانگەی میدیا و زانیاریی هەرێم بڵاویکردەوە، لە بڕگەی یەکەمی کۆبوونەوەی ئەمڕۆی ئەنجومەنی وەزیران بارودۆخی دارایی ئێستای هەرێم و مووچەی مووچەخۆران كە بۆ ماوەی دوو مانگە بە بڕیارێكی نادەستووریی وەزارەتی دارایی فیدراڵ، خەرجكردنی شایستە داراییەكانی هەرێم راگیراوە و دواهەوڵەكانی چارەسەری ئەم بابەتە تاووتوێ دەكرێت.
ئاشکراشیکرد، لە بڕگەی دووەمی کۆبوونەوەکەدا راپۆرتی وەزارەتی كار و كاروباری كۆمەڵایەتی، بەڕێوەبەرایەتیی گشتیی كار و دەستەبەری كۆمەڵایەتی، سەبارەت بە خانەنشینی و دەستەبەری كۆمەڵایەتیی كرێكاران لە هەرێمی كوردستان و پێشكەشكردنی ئامار و زانیاریی بەرەوپێشچوونەكان لەمبارەیەوە گفتوگۆ دەكرێت.
