لیژنەی باڵای ئەمنی لە پارێزگای سلێمانی ڕایگەیاند، “ڕێگە نادەن خۆپیشاندانە بێ مۆڵەتەكان بەردەوامییان هەبێت و سەر بكێشن بۆ پشێویی و توندوتیژیی، ئەو كەسانەش دەستگیردەکرێن کە زیانیان گەیاندووە بە مومتەلەكاتى دەوڵەت.”
لە ئاگاداریینامەیەكدا كە كەمێك لەمەوبەر بڵاویكردەوە و وێنەیەكی دەست “تۆڕی میدیایی ئێستا” كەوتووە، لیژنەی باڵای ئەمنی لە پارێزگای سلێمانی جەختیكردەوە كە “هەموو جۆرە گردبوونەوە و خۆپیشاندانێكى بێ مۆڵەت و زیانگەیاندن بە مومتەلەكاتە گشتی و تایبەتەکان، كە بۆ خزمەتى هاوڵاتییانن، قەدەغەن، هێزەكان دەست كراوەن بۆ ڕاگرتن و مامەڵەكردن لە چوارچێوەی یاسادا.”
ڕاشیگەیاند كە سەرجەم ئەو كەسانە لەلایەن هێزە ئەمنییەكانەوە بە ڕێکاری یاسایی دەستگیر دەکرێن، کە “زیانیان گەیاندووە بە مومتەلەكاتى دەوڵەت و هەموو ئەوانەش كە لە پشتی هاندانى ئەو كەسانەوە بوون.”
لیژنەی باڵای ئەمنی داوا لە لایەنە سیاسییەكان و كەناڵەكانى ڕاگەیاندن دەكات بەرپرسانە لەگەڵ دۆخەكە و ڕووداوەکاندا مامەڵە بكەن.
دەقی ئاگادارییەكە:-
- هێزە ئەمنییەكان چیتر ڕێگە نادەن خۆپیشاندانە بێ مۆڵەتەكان بەردەوامییان هەبێت و سەر بكێشن بۆ پشێویی و توندوتیژیی.
- لێرە بە دواوە هەموو جۆرە گردبوونەوەو خۆپیشاندانێكى بێ مۆڵەت و زیانگەیاندن بە مومتەلەكاتە گشتی و تایبەتەکان، كە بۆ خزمەتى هاوڵاتییانن، قەدەغەن، هێزەكان دەست كراوەن بۆ ڕاگرتن و مامەڵەكردن لە چوارچێوەی یاسادا.
- سەرجەم ئەو كەسانەش لەلایەن هێزە ئەمنییەكانەوە بە ڕێکاری یاسایی دەستگیر دەکرێن، کە زیانیان گەیاندووە بە مومتەلەكاتى دەوڵەت و هەموو ئەوانەش كە لە پشتی هاندانى ئەو كەسانەوە بوون.
- داوا لە سەرجەم لایەنە سیاسییەكان دەكەین كە بەرپرسانە لەگەڵ دۆخەكەدا مامەڵە بكەن.
- پێویستە كەناڵەكانى ڕاگەیاندن بە گیانێکی بەرپرسیارانەوە مامەڵە لەگەڵ ڕووداوەکاندا بکەن.
ڕاگەیاندراوی لیژنەی باڵای ئەمنی
