ئەگەرچی ماوەی دوو رۆژە پێنج لە چالاكوانانی شیلادزێ بڕیاری دادگایان هەیە بۆ ئازادبوون، بەڵام ئاسایشی گشتیی هەولێر ئازادیان ناكات، وەك ئەوەی تیمی پارێزەرانی بەرگری دەیڵێت.
تیمی پارێزەرانی بەرگریکار لە چالاکوان و رۆژنامەنووسانی بادینان لە بانگەوازێكدا دەڵێت، دوو رۆژە پێنج چالاکوانی شیلادزێ بە بڕیاری دادگا ئازادکراون، سەرەڕای ئەوەی بۆ ماوەی دوو ساڵە بە ناحەق لە زیندانن و ئێستاش ماوەی حوکمەکانیان تەواو کردووە، بەم سەرماو سۆڵە لە بەیانییەوە کەس و کاریان کە ژن و منداڵیشیان لەگەڵدایە لەبەردەم ئاسایشی گشتی هەولێرن و لە چاوەروانی ئازادکردنی رۆڵەکانیانن، بەڵام ئاسایش تا ئەو دەققەیە ئازادیان ناکەن ئەمە چ ویژدانێکە؟!
لە بەشێكی دیكەی بانگەوازەكەدا، كە ئاراستەی سەرۆكایەتییەكانی هەرێم، نەتەوە یەكگرتووەكان و رێكخراوەكان كراوە، هاتووە، “ئەم هێشتنەوەیان لە ئاسایش سەرپێچی یاسایە، داواکارین لە بەڕێزتان بێنە دەنگ و ئەم زوڵمەی لەم پێنچ چالاکوانە دەکرێت قبوڵی نەکەن و داواکارین دەستبەجێ ئازادبکرێن”.
پێشتر بەشدار حەسەن پارێزەری زیندانیکراوانی بادینان بە تۆڕی میدیایی ئێستای راگەیاند، ئەوانەی بڕیاری ئازادكردنەكەیان هەیە بریتین لە (كۆڤان تاریق، نێچیرڤان بەدیع، سیروان شەریف و مەحمود ناجی).
ئەوكات ئەوەشی وت، “دوو رۆژی دیکە زیندانیکراوێکی دیکە بە ناوی ئەمجەد شەریف دوای تەواوبوونی ماوەی سزاکەی ئازاددەکرێت”.
