بەرپرسان برینداربوونی 155 كەسیان راگەیاند لە ئاكامی پێكدادانی دوو شەمەندەفەر لە دەوروبەری شاری بەرشەلۆنەی پایتەختی هەرێمی كەتەلۆنیا لە باكووری رۆژهەڵاتی ئیسپانیا.
خزمەتگوزاریی بەهاناوەچوونی ناوچەكە رایگەیاند، لەنێو برینداربووندا حاڵەتی مەترسیدار نییە و زۆرینەیان برین و بەركەوتنی سووكە، لەگەڵ ئەوەشدا 39 كەس گوازراونەتەوە بۆ نەخۆشخانە.
رووداوەكە دەوروبەری كاتژمێر 8ی بەیانی بە كاتی ناوخۆ روویدا، كاتێك یەكێك لە شەمەندەفەرەكان كە لەسەر هەمان هێڵ بوو بەر بەشی دواوەی شەمەندەفەرێكی دیكە كەوت كە لە وێستگەیەكدا وەستابوو.
كاتی رووداوەكە نزیكەی 800 نەفەر لە هەردوو شەمەندەفەرەكەدا بوون. هیچكامیان لەناوەوە گیریان نەخواردوو و خۆیان توانییان بێنە دەرەوە.
راكیل سانشیز، وەزیری گواستنەوە رایگەیاند، لێكۆڵینەوە لە هۆكاری رووداوەكە دەكرێت.
