وەزیری پەروەردەی ئەمریكا رایگەیاند، بەهۆی رێنماییەكانی سەرۆكی ئەمریكا بۆ كەمكردنەوەی 50%ی فەرمانبەرانی، وەزارەتەكەی بەتەواوەتی هەڵدەوەشێندرێتەوە.
لیندا ماكهۆن، وەزیری پەروەردەی ئەمریكا لە چاوپێكەوتنێكدا لەگەڵ تۆڕی هەواڵی فۆكس نیوز-ی ئەمریكی رایگەیاند، بەهۆی بڕیاری سەرۆكی ئەمریكا بۆ كەمكردنەوەی بوودجە و خەرجییە ناوخۆییەكانی وڵات و كەمكردنەوەی نیوەی كارمەندانی وەزارەتەكان، وەزارەتی پەروەردەش بەرەو هەڵوەشاندنەوە دەچێت و ئەوەش ئامانجی سەرۆكی وڵاتەكەیەتی.
وتیشی، “تا ئێستا زیاتر لە هەزار و 300 فەرمانبەری وەزارەتەكەمان ئاگاداركراونەتەوە كە لەماوەی 90 رۆژی داهاتوودا زانیارییەكانیان پێشكەش بە وەزارەت بكەن و لەو ماوەیەشدا كۆتایی بە گرێبەستەكانیان دەهێندرێت”.
دۆناڵد ترەمپ دەیەوێت وەزارەتی پەروەردەی ئەمریكا هەڵبوەشێنێتەوە و دەیەوێت بەرپرسیارێتی پەروەردەیی بۆ دەسەڵاتی خودی ویلایەتەكە بگوازێتەوە ئەمەش لە چوارچێوەی پڕۆژە یاسایی كەمكردنەوەی خەرجییەكان لە ژێر ناوی (بیرۆكراتییەتی فێدراڵی).
