لقی سلێمانی یەکێتیی زانایانی ئایینی ئیسلام رایگەیاند، سکاڵای یاساییان دژی ئەو ژنە چالاکوانە تۆمارکردووە کە فرەژنی بە جۆرێک لە لەشفرۆشی ناوبردووە و قسەی ئەو چالاکوانە بە ناوزڕاندن دادەنێت.
بەپێی راگەیەندراوێکی یەکێتیی زانایانی ئایینی سلێمانی، سکاڵاکەیان لە رۆژی 5ی 12ی 2022 لەسەر راسپاردەی مەکتەبی تەنفیزیی یەکێتیی زانایان لە رێگەی داواکاری گشتییەوە تۆمارکردووە.
یەکێتیی زانایان روونی کردووەتەوە، سکاڵاکەیان لەسەر ئەو لێدوانە بووە کە چالاکوان شیلان حەمە نوری لە بەرنامەیەکی تەلەڤیزیۆنیدا رایگەیاند، “فرەژنی بەشێکە لە لەشفرۆشی”.
لە راگەیەندراوەکەدا هاتووە، ” ئێمە وەکو لقی سلێمانی یەکێتیی زانایانی ئایینی ئیسلامی کوردستان لە دژی ئەو وتە و بێڕێزیانەی کە خاتوو (شیلان حەمە نوری) لەبەرنامەیەکی تەلەڤیزیۆنیدا کردوویەتی بەرامبەر بەوکەسانەی کە زیاتر لە هاوسەرگیرییەکیان ئەنجامداوە و لەهەردوو رەگەزی نێر و مێ، کە بە جۆرێک لە لەشفرۆشی ناوزەدیکردون، کە ئەمە ناوزڕاندنی هەموو ئەو تاک و خێزانانەیە کە ئەو پرۆسەیەیان ئەنجامداوە”.
