رابەری باڵای ئێران لە دیداریدا لەگەڵ سەرۆك وەزیرانی عێراق دان بە “شكستی لێكتێگەیشتن و هەماهەنگییەكانی نێوان عێراق و ئێران”دا دەنێت.
عەلی خامنەیی، رابەری باڵای شۆڕشی ئیسلامیی ئێران ئەمڕۆ لە تاران چاویكەوت بە محەمەد شیاع سودانی، سەرۆك وەزیرانی عێراق كە بە سەردانێكی دوو رۆژە لە ئێرانە و وتی، “لە ماوەكانی رابردوودا وتووێژ و لێكتێگەیشتنی باش ئەنجامدراون، بەڵام نەگەیشتوونەتە قۆناغی كاركردن”.
وتیشی، بۆیە پێویستە جوڵەبكەین بۆ كاركردن بە سەرجەم رێككەوتنەكان، بەتایبەت لە بواری هەماهەنگیی ئابوری، ئاڵوگۆڕی شمەك و هێڵە ئاسنینەكان.
بەر لە دیداری خامنەیی، سەرۆك وەزیرانی عێراق لەگەڵ ئیبراهیم رەئیسی، سەرۆكی ئێران كۆبووەوە و رایگەیاند، بەغداد رێگە بە بەكارهێنانی خاكی وڵات بۆ هەڕەشەی سەر دراوسێكانی نادات.
سەردانەكەی بۆ تاران، یەكەم سەردانی محەمەد شیاع سودانی-یە پاش هەڵبژاردنی بە سەرۆك وەزیران.
