سەرۆكی لیژنەیەكی پەرلەمان دەڵێت، دابەزاندنی نرخی كارتی پڕكردنەوەی باڵانسی مۆبایل نایاساییە.
دوای بڕیارەكەی وەزارەتی گواستنەوە و گەیاندنی عێراق بۆ دابەزاندنی نرخی كارتی پڕكردنەوەی باڵانسی مۆبایل، زوهرە بجاری سەرۆكی لیژنەی راگەیاندن و پەیوەندییەكان لە ئەنجومەنی نوێنەران رایگەیاند، لابردنی باجی 20% لەسەر كارتەكانی مۆبایل لە لایەن ئەنجومەنی وەزیرانەوە كارێكی نایاساییە.
بەپێی وتەی سەرۆكی لیژنەی راگەیاندن و پەیوەندییەكان، لابردنی باج لەسەر كارتی پڕكردنەوەی باڵانسی مۆبایل، پێویستی بە یاسایە و دەبێت لە رێگەی ئەنجومەنی نوێنەرانەوە بكرێت، نەك بە بڕیاری حكومەت.
لە چەند رۆژی رابردوودا هیام یاسری، وەزیری گواستنەوە و گەیاندن بڕیاری دا نرخی كارتی پڕكردنەوەی باڵانسی مۆبایل بە رێژەی 20% هەرزانبكرێت و بڕیارەكە لە سەرەتای مانگی داهاتووەوە جێبەجێدەكرێت.
