جەیمی دیمۆن بەڕێوەبەری جێبەجێکاری کۆمپانیا جەی پی مۆرگان کە گەورەترین بانکی ئەمریکییە ڕایگەیاندووە، پاڵنەری زۆر هەن کە وادەکەن لە شەش بۆ نۆ مانگی داهاتوودا ئەمریکا و جیهان ڕووبەڕووی قەیرانی قوڵی ئابوری ببنەوە.
بەڕێوەبەری جێبەجێکاری گەورەترین بانکی ئەمریکا لە چاوپێکەوتنێکدا لەگەڵ کەناڵی CNBC ڕوونیکردووەتەوە، کە لە کاتێکدا ئابووریی ئەمریکا ئێستا لە دۆخێکی باشدایە، بەڵام کۆمەڵێک نیشاندەر و بابەتی جیهانی هەن کە زەنگ لێدەدەن بۆ ڕوودانی قەیرانی قووڵ، لەنێویاندا کاریگەریی بەرزبوونەوەی هەڵاوسان و بەرزبوونەوەی ڕێژەی سوودی چاوەڕوانکراو و کاریگەرییەکانی بڕیارەکانی بانکی فیدراڵی، هەروەها شەڕی ڕووسیا و ئۆکرانیا.
وتیشی، “ئەگەر لیستێک بۆ هەموو قەیرانەکانی پێشوو دروستبکرێت، پێموایە دەتوانیت ئەمجارە پێشبینی ئەگەری ڕوودانی ئەو قەیرانە بکەیت”.
دیمۆن ئامۆژگاری دەکات، “ئەگەر پێویستت بە پارەکە بوو، هەوڵبدە ئێستا کۆیبکەیتەوە”.
پێشبینیی کردووە، پێوەرەکانی S&P 500 زیاتر لە ئاستەکانی ئێستای دابەزێت، ئاماژەی بەوەشکردووە کە ڕەنگە ئەم دابەزینە نزیکەی 20% بێت، لەڕاستیدا ئەمساڵ پێوەرەکە بە ڕێژەی نزیکەی 20% دابەزیوە.
دیمۆن وتی،”20%ی داهاتوو زۆر بە ئازارتر دەبێت لە یەکەمیان”.
