یەكەم دیمەنی سێ دووری (3D)ی بەشێك لە هەورەكانی نێو بەرگەهەوای هەسارەی موشتەری (جوپیتەر) بڵاوكرانەوە كە لە ڕێگەی داتاکانی مانگی دەستکردی جونۆ Juno کۆکراونەتەوە و کراون بە ڤیدیۆ.
لوقمان حەوێز، شارەزای كەشناسیی كورد و ئەندامی كۆمەڵەی گەردونناسی تێكساس لەگەڵ بڵاوكردنەوەی دیمەنەكەدا ڕایگەیاند، کەشتی و مانگی دەستکردی جونۆ لەلایەن ناساوە لە بەرواری 5ی ئابی 2011 نێردرا بەرەو دیوە گازییەکەی نێو کۆمەڵەی خۆر و هەسارەی موشتەری، دەبووایە کارەکانی لە ناوەڕاستی ساڵی 2021 کۆتایی پێبێت، بەڵام تاوەکو ساڵی 2025 کاردەکات و دواتر بەردەدرێتەوە سەر ڕووی هەسارەکە، لەڕێگەی بەربوونەوەشدا کۆمەڵێک زانیاری لەسەر بەرگەهەوای موشتەری تۆماردەکات و بەر لەوەی تەواو پەکیبکەوێت ئەو زانیارییانە دەنێرێتەوە.
“هەسارە گازییەکانی نێو کۆمەڵەی خۆر کە (موشتەری، ساتۆرن، ئۆرانۆس و نیپتۆن) دەگرێتەوە بەردینی نین وەک هەسارەی زەوی، بەڵکو سەر ڕووەکانیان شلە، لە گازی هایدرۆجین، هیلیۆم و میسان پێکدێت” وەك ئەوەی لوقمان حەوێز ئاماژەی پێداوە.
دەشڵێت، وڵاتی چین-یش لە چێوەی پڕۆگرامی پشکنینەکانی ئاسمان لە بەرنامەدایە کەشتیەک بنێرێتە سەر ڕووە شلەکەی هەسارەی موشتەری و بۆ ماوەیەکی کەم پشکنین بکات لەبارەی پێکهاتەکانی بەرگەهەوا و سەر ڕووی هەسارەكە.
