لەلایەن هێزەكانی پۆلیسی سلێمانییەوە چوار كەس دەستگیركران كە تۆمەتبارن بە كوشتنی هاوڵاتییەك و دوای ڕووداوەكەوە هەڵاتبوون.
بەڕێوەبەرایەتیی پۆلیسی پارێزگای سلێمانی بڵاویكردەوە، دوای ئەوەی ڕۆژی 2022/7/9، ڕووداوێكی تەقەكردن لە نزیك پاركی ئازادیی سلێمانی ڕوویدا و تیایدا كەسێك بەفیشەك برینداركرا و دوای دوو ڕۆژ مانەوەی لە نەخۆشخانە گیانیلەدەستدا، هێزەكانی پۆلیس گەیشتنە شوێنی ڕووداوەكە و كەشف و هێڵكاری بۆ شوێنی ڕووداوەكە ئەنجامدرا و لێكۆڵینەوەكان بۆ دۆزینەوە و دەستگیركردنی تۆمەتباران دەستیپێكرد. كە هەڵاتبوون.
دوای ڕاسپاردنی بەشی پۆلیسی نەهێشتنی تاوان/ نوسینگەی لێكۆڵینەوە لە تاوانەكانی كوشتن و بنكەی پۆلیسی سەرا بۆ بەدواداچوون لەسەر ڕووداوەكە، سەرنجام چوار تۆمەتبار بەناوەكانی (ت.م.ع.، ب.ئـ.م.، ئـ.ئـ.م و ئـ.س.ت.) دەستگیركران، دەستیشگیرا بەسەر ئەو دەمانچەیەدا كە تۆمەتباران تاوانەكەیان پێ ئەنجامدابوو، وەك ئەوەی پۆلیسی سلێمانی ئاماژەی پێدا.
ئەوەشی ڕوونكردەوە، تۆمەتباران لە بەردەم دادوەری لێكۆڵینەوەدا دانیان بە تاوانەكەیاندا ناوە، لەئێستادا بە بڕیاری دادوەر و بەپێی ماددەی 406 لە یاسای سزادان ڕاگیراون و لێكۆڵینەوەكان بەردەوامە.
