ژووری بازرگانی و پیشەسازی سلێمانی ئاگاداری سەرجەم ئەو كۆمپانیایانە دەكاتەوە كە لەكاركردن وەستاون و ساڵانێكی زۆرە باجیان نەداوە، لە ئێستادا لە لایەن وەزارەتی داراییەوە بڕیاری لێخۆشبوونیان بۆ دەركراوە و دەبەخشرێن لە باج و تەنها باجی یەك ساڵیان لێوەردەگيرێت.
بەپێی ڕاگەیەندراوێكی ژووری بازرگانی و پیشەسازی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، لە كۆبوونەوەكەی دوێنێی وەزیری دارایی و ئابوریی ھەرێم و ژووری بازرگانی و پیشەسازی سلێمانی كە بەڕێوەبەری گشتیی باجی هەرێم ئامادەبوو داوا لە ژووری بازرگانیی سلێمانی كرا كە ئەو كۆمپانیایانە ئاگاداربكاتەوە كە ساڵانێكی زۆرە لە كاركردن وەستاون و باجیان نەداوە و سەردانی فەرمانگەی باج بكەن بە مەبەستی پاكتاوكردن و تەنها باجی یەك ساڵیان لێوەردەگرێت.
لە ڕاگەیەندراوەكەدا هاتووە، ئەم بڕیارە تاكو 20ی ئەیلولی 2022 كاری پێدەكرێت و بە هیچ شێوەیەك درێژناكرێـتەوە.
