بارهەڵگرێك كە ئاردی بارکردبوو، لە بەردەم تونێلی دەربەندیخان وەرگەڕا و شۆفێرەكەی برینداربوو.
بەڕێوەبەرایەتیی هاتوچۆی دەربەندیخان ڕاگەیەندراوێكی لە بارەی ڕووداوەكەوە بڵاوكردەوە و دەڵێت، “کاتژمێر 10:10 خوولەکی بەیانیی ئەمڕۆ چوارشەممە، ئۆتۆمبێلێکی بارهەڵگر دوای ئەوەی کۆنترۆڵی لەدەست دا، لە بەردەم تونێلی دەربەندیخان وەرگەڕا”.
بەپێی ڕاگەیەندراوی بەڕێوەبەرایەتیی هاتوچۆی دەربەندیخان، شۆفێری ئۆتۆمبێلەکە برینداربووە و ڕەوانەی نەخۆشخانەی فریاکەوتنی دەربەندیخان کراوە.
ڕووداوەكانی هاتوچۆ لە بەردەم تونێلی دەربەندیخان بوونەتە دیاردە، زۆربەی ڕووداوەكان وەرگەڕانی بارهەڵگر و تانكەرن و هەندێك جار گڕگرتن و سووتانی سوارڕۆكانیان لێدەكەوێتەوە.
