چارلز لوکلێری شۆفێری تیمی فێراری لە پێشبڕکێی بەلجیکا دووچاری کێشەیەکی تەکنیکی بوو، تیمی فێراری پێیان وایە ماکس ڤێرشتاپن هۆکار بووە بۆ دروستبوونی ئەو کێشەیە.
لوکلێری شۆفێری فێراری و ڤێرشتاپنی شۆفێری “ڕێد بووڵ”، بەهۆی سزادانەوە لە پێگەکانی چوارەم و دواترەوە دەستیان بە پێشبڕکێی بەلجیکا کرد، سوودیان لە ڕووداوەکانی هامیڵتۆن لە تیمی مێرسیدس و دۆخی شۆفێرانی دیکە وەرگرت و بە خێرایی بەرەو پێشەنگی ڕۆیشتن.
لە ناکاو بەهۆی بەرکەوتنی پارچەیەک کانزا بە سیستمی “برەیک”ی ئوتۆمبێلەکەی لوکلێر، برەیکەکانی گەرم بوون و شۆفێرەکەی مۆناکۆ بە ناچارییەوە گەڕایەوە بۆ گەراج تاوەکو کێشەکەی بۆ چارەسەر بکەن.
لە تۆمارەکاندا دەرکەوتووە، ماکس ڤێرشتاپن کە لە پێش لوکلێرەوە بووە، پارچەیەکی نامۆی لە ئوتۆمبێلەکەی کردووەتەوە و فڕێیداوەتە مەیدانی پێشبڕکێکردن، ئەو پارچەیەش بووەتە هۆی کێشە تەکنیکییەکەی لوکلێر.
