ئه‌فسانه‌ی باسکه‌ی ئه‌مریکا، لیبرۆن جه‌یمس ڕەزامەندیی دەربڕیوە بۆ ماوه‌ی دوو وه‌رزی دیکه گرێبه‌سته‌که‌ی له‌گه‌ڵ تیمی لۆس ئه‌نجلس له‌یکه‌رز نوێ بکاته‌وه.
به‌پێی گرێبه‌ستێکی نوێ که له نێوان لیبرۆن جه‌یمس و تیمی لۆس ئه‌نجلس له‌یکه‌رز ڕێککه‌وتنی له‌سه‌ر کراوه، یاریزانه‌که تاوه‌کو وه‌رزی 2024/2025 له له‌یکه‌رز به‌رده‌وام ده‌بێت، له‌و ماوه‌یه‌شدا بڕی 97.1 ملیۆن یورۆ مووچه و پاداشتی بۆ ته‌رخان ده‌کرێت، هه‌روه‌ها چانسی ئه‌وه‌شیان ده‌بێت وه‌رزێکی دیکه درێژی بکه‌نه‌وه.
جه‌یمسی ناسراو به “پادشا” گرێبه‌سته کۆنه‌که‌ی تاوه‌کو 2023 به‌رده‌وامی هه‌یە، بڕیاربوو له‌م وه‌رزه‌دا 44.5 ملیۆن یورۆ مووچه وه‌ربگرێت.
لیبرۆن جه‌یمس یه‌کێکه له ئه‌فسانه‌کانی باسکه‌ی ئه‌مریکا، چوار جار براوه‌ی خولی یانه پیشه‌گه‌ره‌کانی ئه‌مریکا بووه (NBA).
له ساڵی 2018وە په‌یوه‌ندی به له‌یکه‌رزه‌وه کردووه، له ده‌ره‌وه‌ی پاڵه‌وانێتییه‌کانی ئه‌مریکا دوو جار میدالیای ئاڵتوونیی ئۆڵیمپیادی بەدەستهێناوە.
