لانیكەم 34 كەس گیانیان لەدەستدا بەهۆی دوو تەقینەوەی خۆكوژی كە بنكەیەكی سەربازی و سەرۆك هەرێمێكی لە ئەفغانستان كردە ئامانج.
میدیاكان ئەمڕۆ یەكشەممە 29ی تشرینی دووەم بڵاویانكردەوە لە ویلایەتی گەزنە-ی ڕۆژهەڵاتی وڵات، 31 سەرباز كوژران و 24ی دیكەش برینداربوون، دوای ئەوەی هێرشبەرێك بارهەڵگرێكی سەربازیی پڕ لە تەقینەوەی گەیاندە بنكەی كۆماندۆزی سوپا، بەر لەوەی بیتەقێنێتەوە.
بەپێی بەرپرسان هێرشەكە خوێناویترینی ئەفغانستان بووە لەماوەی چەند مانگی ڕابردوودا.
لە باشوری ئەو وڵاتەش بەرپرسان ڕایانگەیاند، خۆكوژێك بە ئۆتۆمبێلێكی بۆمبڕێژكراوەوە كاروانێكی سەرۆكی ئەنجومەنی هەرێمی لە زوبال كردە ئامانج و بەهۆیەوە لانیكەم سێ كەس كوژران و 12ی دیكەش برینداربوون، كە لەنێوانیاندا منداڵ هەیە.
سەرۆكی ئەنجومەنەكە لە هێرشەكە ڕزگاری بوو، تەنها برینێكی كەمی هەیە، تائێستاش هیچ لایەنێك بەرپرسیارێتی خۆی لە هێرشەكان ڕانەگەیاندووە.
