كۆماری ئیسلامیی ئێران بە فەرمی دەڵێت، توانای دروستكردنی بۆمبی ئەتۆمییان هەیە.
محەمەد ئیسلامی سەرۆكی دەستەی وزەی ئەتۆمیی ئێران ڕایگەیاند، “ئێران لەڕووی تەكنیكییەوە توانای دروستكردنی بۆمبی ئەتۆمیی هەیە، بەڵام ئەو بابەتە لە خشتەی كارەكانیدا نییە”.
سەرۆكی دەستەی وزەی ئەتۆمیی ئێران جەختیكردەوە كە دۆسیەی ڕەهەندە سەربازییەكانی پرۆگرامی ئەتۆمیی ئێران كە بانگەشەی بۆ دەكرێت داخراوە و دووبارەكردنەوەی ئەو بانگەشە بێبنەمایانە قبوڵكراونییە و دەڵێت، “ئەو بانگەشەیە لەسەر بنەمای پڕوپاگەندەی دووڕووەكانی موجاهیدینی خەلق و ئیسرائیل بنیادنراوە و ماوەی 20 ساڵە دووبارەی دەكەنەوە”.
محەمەد ئیسلامی كە لێدوانی بۆ میدیای وڵاتەكەی داوە و توویەتی، “تۆمەتباركردنمان بە هەوڵدان بۆ بەدەستخستنی چەكی ئەتۆمی، تۆمەتێكی بێبنەمایە و قەوارەی زایۆنی بە پشتیوانیی بەرهەڵستكارانی شۆڕش دەیخاتەڕوو، كامێراكانی چاودێری لە وێستگە ئەتۆمییەكاندان و دەیسلەمێنن كە ئێران هەوڵی دروستكردنی چەكی ئەتۆمیی نەداوە”.
