د. باخان ئازاد لە پای دەستگیركردنی “تۆمەتباری ڕووداوی تەقەكردن لە ماڵەكەی”، سوپاسی بافڵ جەلال تاڵەبانی و قوباد تاڵەبانی دەكات.
لە كۆنگرەیەكی ڕۆژنامەوانیدا لە شاری سلێمانی، ئەمڕۆ پێنجشەممە د. باخان ئازاد باسی لە هەواڵی دەستگیركردنی ئەو كەسە كرد كە هاوسەری خۆیەتی و تۆمەتبارە بەوەی لە ماوەی ڕابردوودا بە نارنجۆك و چەك هێرشیكردووەتەسەر ماڵەكەی لە سلێمانی.
د. باخان ئازاد سوپاسی بافڵ جەلال تاڵەبانی سەرۆكی یەكێتیی نیشتمانیی كوردستان و قوباد تاڵەبانی جێگری سەرۆكی ئەنجومەنی وەزیرانی كرد و وتی، “سەلماندتان ئێوە ڕێگە بە هیچ كەسێك نادەن بە ناوی حزبەكەی ئێوەوە و بە پلە و پۆستی حزبییەوە دەستدرێژی بكاتەسەر دوو ژن و دوو منداڵ، ئەمە گەورەترین ئیمتیاز بوو لە مێژووی یەكێتیی نیشتمانیی كوردستان-دا كە چیتر یەكێتی ڕێگەنادات بەرپرسەكانی سووكایەتی بە خەڵك بكەن”.
ئەمڕۆ پێنجشەممە هەواڵی دەستگیركردنی شێرزاد باوەنووری سەرۆكی كۆمەڵەی پێشمەرگە دێرینەكانی گەرمیان لە كەلار بڵاوكرایەوە، ناوبراو هاوسەری د. باخان ئازادە.
