ئەنجومەنی نوێنەرانی عێراق ئەمڕۆ شەممە کۆدەبێتەوە، کۆبوونەوەکە تایبەت دەبێت بە تاوتوێکردنی هێرش و بۆردوومانەکانی ئەمدواییەی تورکیا.
بەپێی ڕاگەیەندراوێکی سەرۆکایەتیی ئەنجومەنی نوێنەرانی عێراق، ئەنجومەنەکە بۆ تاوتوێکردنی هێرشەکانی تورکیا بە ئامادەبوونی هەردوو وەزیری دەرەوە و بەرگری و سەرۆک ئەرکانی سوپای عێراق کۆدەبێتەوە.
کۆبوونەوەی ئەمڕۆی ئەنجومەنی نوێنەران تایبەتە و لەسەر داواکاریی ژمارەیەک پەرلەمانتارە کە پێشتر واژوویان کۆکردبووەوە، جگە لە داواکاری کۆبوونەوە داوای ئامادەبوونی مستەفا کازمی سەرۆک وەزیرانی عێراق و وەزیری بەرگرییان کردبوو.
ئەم کۆبوونەوەیەی پەرلەمان دوای هێرشی ڕۆژی 20ی ئەم مانگەی تورکیا دێت بۆ سەر گوندی پەرەخی سەربە ئیدارەی زاخۆ، کە بەهۆیەوە نۆ گەشتیاری بەڕەگەز عەرەب کوژران و 23 برینداربوون.
