بافڵ جەلال تاڵەبانی سەرۆکی یەکێتیی نیشتمانیی کوردستان، داوادەكات هەردوو حكومەتی هەرێم و فیدراڵ ڕووبەڕووی هێرشەكانی توركیا ببنەوە و دەڵێت، “بەئامانجگرتنی خەڵكی سڤیل و بێتاوان ئیدانە دەكەین”.
بافڵ جەلال تاڵەبانی سەرۆکی یەکێتیی نیشتمانیی کوردستان، پەیامێكی لەبارەی هێرشەكەی ئەمڕۆی توركیا بۆ سەر زاخۆ بڵاوكردەوە و ڕایگەیاند، “پرسە و هاوخەمیی قووڵی خۆمان ئاراستەی كەسوكاری قوربانییان و شەهیدانی ڕووداوەكەی ئەمڕۆی سنووری ئیدارەی زاخۆ دەكەین و هیوای چاكبوونەوە بۆ بریندارەكان دەخوازین”.
سەرۆکی یەکێتیی نیشتمانیی کوردستان جەختدەكاتەوە، “بەزاندنی سنوورەكانی هەرێمی كوردستان و عێراق و چەندبارەبوونەوەی تۆپباران و هێرشەكانی سوپای توركیا و بەئامانجگرتنی خەڵكی سڤیل و بێتاوان ئیدانە دەكەین. داوا لە حكومەتی عێراقی فیدراڵ و هەرێمی كوردستان دەكەین ڕووبەڕووی ئەم پێشهاتە نەخوازراوانە ببنەوە كە ئاسایشی نیشتمانی و سەقامگیریی خەڵكەكەیان ڕووبەڕووی مەترسی كردووەتەوە”.
بافڵ جەلال تاڵەبانی لە پەیامەكەیدا دەڵێت، “ڕووبەڕووبوونەوە و ڕێگریكردن لەم هێرشانە پەیوەستە بە هەڵوێستی نیشتمانی و یەكگرتوویی هەموو لایەكەوە و دەبێت كۆدەنگیی نیشتمانی بەرامبەر ئەم ڕووداوانە دروستبكرێت”.
