پۆلیسی فیدڕاڵی عێراق لە ئەمڕۆوە هەوڵدەدات وەک جێبەجێکردنی یەکەم هەنگاوی ڕێکەوتنی شەنگال لە نێوان حکومەتی هەرێم و بەغداد ئاڵای هێز و لایەنەکان دابگرێت.
ئەمڕۆ 27 ی تشرینی دووەم بڕیارە پۆلیسی فیدراڵی هەموو ئەو ئاڵا و دروشمانە لە شەنگال لابەرێت کە لەلایەن حکومەتی عێراقەوە دانیان پێدا نەنراوە.
ماوەی چەند ڕۆژێکدا چوار لیوای پۆلیسی فیدراڵی عێراق ئامادەن بۆ ئەوەی لەناو شەنگالدا ڕێککەوتننامەکەی نێوان بەغداد و هەرێم جێبەجێ بکەن.
وەزارەتی بەرگری عێراق ئاشکرایکرد، یەکێک لە هەنگاوەکانی جێبەجێکردنی خاڵەکانی ڕێککەوتننامەی شەنگال دەستیپێکردووە و پۆلیسی فیدڕاڵی دەچێتە ناو شاری شەنگالەوە.
ڕۆژی 22 ی ئەم مانگە لیوا تەحسین خەفاجی، وتەبێژی فەرماندەی ئۆپەراسیۆنە هاوبەشەکان، بە ئاژانسی فەرمی عێراقی ڕاگەیاندبوو، “سەرەتا ئەندامانی پۆلیسی فیدڕاڵی دەچنە ناو قەزای شەنگالەوە و دۆسییەی ئەمنی ناو شارەکە بەدەست پۆلیسەوە دەبێت”.
بە وتەی خەفاجی، جگە لە پۆلیس ڕێگە بە هیچ هێزێکی دیکە نادرێت بچێتە ناو شارەکە و تەنها ئاڵای عێراقیش لەناو قەزاکە هەڵدەکرێت.
بەپێی زانیارییەکان وەک چۆن دۆسییەی ئەمنی ناو شارەکە بە فیرقەی شەشی پۆلیسی فیدڕاڵی سپێردراوە، ئاواش دۆسییەی دەرەوەی شارەکە لە دەست سوپای عێراقدا دەبێت.
رۆژی 9 تشرینی یەکەمی ئەمساڵ، هەولێر و بەغدا لەسەر دروستکردنی ئیدارەیەکی نوێ بۆ قەزای شەنگال رێککەوتن.
