بەڕێوەبەرایەتیی گشتیی پۆلیسی گەرمیان ڕایگەیاند، کارمەندێکی پۆلیسی گەرمیان لەکاتێکدا لە پشوودا بووە لەکاتی پاککردنەوەی چەکەکەیدا گوللـەیەکی بەرکەوتووە و گیانیلەدەستداوە.
لە ڕاگەیەندراوێکدا عەلی جەمال قەدوری وتەبێژی بەڕێوەبەرایەتیی گشتیی پۆلیسی گەرمیان ڕایگەیاند، نیوەڕۆی ئەمڕۆ کارمەندێکی بنکەی پۆلیسی دوازدە ئیمام، لەکاتێکدا لە پشوودابووە لە ماڵەکەی خۆیدا گوللـەیەکی بەرکەوتووە و گیانیلەدەستداوە.
بەپێی ڕاگەیەندراوەکە، کەسوکاری ئەو پۆلیسە باسیان لەوەکردووە، لەکاتێکدا دەمانچەکەی پاککردووەتەوە گوللـەیەکی لەدەست دەرچووە و بەر سەری کەوتووە، پاش گەیاندنی بە نەخۆشخانە گیانیلەدەستداوە.
ئەو کارمەندەی پۆلیسی گەرمیان ناوی (چیا عوسمان محەمەد)ـە، لەدایکبووی 1981ـە و لە گەڕەکی شۆڕشی قەزای کفری دادەنیشێت.
