ڕێكخراوی هیومان ڕایتس وۆچ ڕەخنەی لە پرۆژەیاسای “تاوانی زانیاری” دەگرێت كە لەلایەن عێراقەوە تاوتوێدەكرێت و دەڵێت، دژ دەوەستێتەوە لەگەڵ یاسای نێودەوڵەتی و دەستوری عێراق.
ڕێكخراوی بەرگری مافەكانی مرۆڤ (هیومان ڕایتس وۆچ) ڕۆژی چوارشەممە 25ی تشرینی دووەم ڕایگەیاند، پرۆژەیاسای تایبەت بە تاوانی تەكنەلۆجیای زانیاری دەكرێت بەكاربهێنرێت بۆ خنكاندنی ئازادی ڕادەربڕین، كە بەكردەیی لە عێراق لەژێر هێرشدایە.
لە 23ی ئەم مانگە یاسادانەرانی عێراقی پرۆژەیاساكەیان تاوتوێكرد و بڕیاریاندا لە 29ی ئەم مانگە خوێندنەوەی دووەمی بۆ بكرێت.
ڕێكخراوەكە وتی، “پرۆژەیاساكە ئەحكامی ناڕونی تیایە كە ڕێگە بە دەسەڵاتدارێتی عێراقی دەدات بە توندی سزای ئەو دەربڕینە بدات كە پێیوایە هەڕەشەیە بۆ سەر بەرژەوەندییە حكومی و كۆمەڵایەتی و ئاینی-ییەكان”.
دەشڵێت، “زۆرێك لە مادەكانی بەكارهێنانی ئامێری كۆمپیوتەر لەوەی پەیوەندی بە زۆرێك لە چالاكییە جۆراوجۆرەكانەوە هەیە بەتاوان دەناسێنێت، زۆریشیان ناڕێكخراون، بەبێ هیچ پێوەرێكی دیاریكراو لەوەی كامەیە تاوان. ئەم مادانە وا دەردەكەون كە پێچەوانەن لەگەڵ یاسای نێودەوڵەتی و دەستوری عێراق، بەشێوەیەكی مەترسیداریش مافی ئازادی ڕادەربڕین و پێكهێنانی كۆمەڵەكان دیاریدەكات”.
بۆ نمونە ڕێكخراوەكە باس لە مادەی سێی پرۆژەیاساكە دەكات كە ئاماژە بەوەدەكات سزای تاوان دەگاتە زیندانی هەتایی و پێبژاردن لەنێوان 21 هەزار بۆ 42 هەزار دۆلاری ئەمریكی بۆ هەر كەسێك ئامێری كۆمپیوتەر و ئینتەرنێت بە مەبەست بەكاربهێنێت بۆ “زیانگەیاندن بە سەربەخۆیی وڵات و یەكێتییەكی و سەلامەتی و بەرژەوەندییە ئابوری یان سیاسی یان سەربازی یان ئەمنییە باڵاكانی” یان “بەشداری یان وتوێژ یان بانگەشە یان مامەڵە لەگەڵ لایەنە دژەكاندا بكات بەهەر جۆرێك لە جۆرەكان بە ئامانجی تێكدانی ئاسایش و سیستمی گشتی یان مەترسی دروستكردن بۆ سەر وڵات”.
هەروەك مادەی شەشەم هەمان سزای بەندكردن و پێبژاردنی دیاریكردووە بۆ بەكارهێنانی كۆمپیوتەر یان تۆڕی زانیاری بۆ “وروژاندنی هەستی مەزهەبی و تایفی یان زیانگەیاندن بە ئاسایش و سیستمی گشتی، یان زیانگەیاندن بە ناوبانگی وڵات”، یان “بڵاوكردنەوە و گەیاندنی ڕوداوی ناڕاست یان چەواشەكارانە بە مەبەستی لاوازكردنی متمانە بە سیستمی دارایی ئەلیكترۆنی یان وەرەقەی بازرگانی و دارایی ئەلیكترۆنی و ئەوەی دەیگرێتەوە یان زیانگەیاندن بە ئابوریی نیشتیمانی و متمانەی دارایی دەوڵەت”.
ڕێكخراوەكە جەختیشدەكاتەوە، بەهۆی ناڕۆشنی ئەو ماددانەوە و فراوانی ئەوانەی دەیگرێتەوە، هەروەها بەهۆی قورسی سزا سەپێنراوەكان، دەشێت دەسەڵات بۆ سزادانی ڕادەربڕینی ئاسایی بەكاربهێنرێت بەبیانوی هەڕەشە و مەترسی بۆ سەر بەرژەوەندییە حكومی یان ئاینی یان كۆمەڵایەتییەكان.
