دەربارەی دابەشكردنی بەشە خۆراكی مانگانەی هاوڵاتییان وەزارەتی بازرگانیی عێراق دڵنیایی دەدات.
موسەننا فرێجی، وتەبێژی وەزارەتەكە رایگەیاند، وەزارەتی بازرگانی كاری كۆنترۆڵ، پشكنین و دڵنیابوونەوە لە سەلامەتیی ماددەكانی بەشە خۆراكی مانگانە دەكات. هەرچی سەبارەت بە ماددە خۆراكییەكانی كەرتی تایبەتە، بە هەماهەنگی لایەنە پەیوەندیدارەكان پشكنین بۆ خۆراكەكانی ناو بازاڕەكان دەكرێت لەڕووی كات و ماوەی بەكارهێنان و بەسەرچوونیانەوە.
وتیشی، ” بڕی بەشە خۆراك لەناو ئەمبارەكاندا بەشی چوار مانگ دەكات”.
بەردەوام تۆمارەی ئەندامانی خێزان لە پارێزگاكاندا نوێدەكرێتەوە، وەك ئەوەی فرێجی ئاماژەی پێدا و ئاشكراشیكرد، بەپێی ئەو تۆمارانە ژمارەی ئەو كەسانەی گەشتی دەرەوەی عێراقییان كردووە گەیشتووەتە 49 هەزار و 684 كەس كە لە لیستی خۆراكدا دەرهێندراون، هەروەها ژمارەی ئەوانەش كۆچی دواییان كردووە 101 هەزار و 194 كەسن، كە ناویان سڕدراوەتەوە.
