بڕیارە سبەی دەست بە دابەشكردنی مووچەی ئەم مانگە بكرێت و بەرپرسێكی داراییش دەڵێت، لیستی زۆرینەی وەزارەت و فەرمانگەكان تەواو بووە.
بەپێی ئەو خشتەیەی دوێنێ لەلایەن وەزارەتی دارایی و ئابورییەوە بڵاوكرایەوە، سبەی بە دابەشكردنی مووچەی وەزارەتی تەندروستی و هێزەكانی 70 و 80ی پێشمەرگە دەست بە دابەشكردنی مووچەی مانگی حوزەیران دەكرێت.
حەسەن ڕەشید بەڕێوەبەری گەنجینەی یەكی سلێمانی بە تۆڕی میدیایی ئێستای ڕاگەیاند، لیستی مووچەی وەزارەتی تەندروستی تەواو بووە و ئامادەیە بۆ دابەشكردنی مووچە.
وتیشی، “لیستی مووچەی زۆرینەی وەزارەت و فەرمانگەكانی دیكەشمان ئاراستەكراوە و تەواو بووە، هیچ شوێنێك نامێنێت لە ڕۆژی خۆیاندا تەواو نەبێت، بۆیە لەڕووی ئیدارییەوە هیچ گرفتێك لەبەردەم دابەشكردنی مووچەی ئەم مانگەدا نییە”.
بۆ ئەم مانگە خشتەی دابەشكردنی مووچە پێشخراوە و بڕیارە لەماوەی هەشت ڕۆژدا و بەر لە هاتنی جەژنی قوربان سەرجەم مووچەخۆران مووچەیان پێبدرێت.
بۆ یەكەمجارە خشتەی دابەشكردنی مووچە پێشدەخرێت، بەپێی زانیارییەكان زیادبوونی داهاتی نەوت و ناوخۆ هۆكاری پێشخستنەكەیە.
