بەڕێوەبەرایەتیی ئاسایشی سلێمانی ئاشکرایکرد، لەکاتێکدا هەوڵیانداوە بۆ دەستگیرکردنی تۆمەتبارێکی ماددەی هۆشبەر، تۆمەتبارەکە ڕووبەڕوویان بووەتەوە و کارمەندێکی هێزەکانیان کوژرا.
لە ڕوونکردنەوەیەکدا بەڕێوەبەرایەتیی ئاسایشی سلێمانی ڕایگەیاند، بەرەبەیانی ئەمڕۆ شەممە هێزەکانیان بەمەبەستی دەستگیرکردنی تۆمەتبارێک، کە فەرمانی دەستگیرکردنی هەبووە بە یاسای ماددەی هۆشبەر، تۆمەتبارەکە ڕووبەڕوویان بووەتەوە.
لە ڕوونکردنەوەکەدا هاتووە، لەئەنجامی ڕووبەڕووبوونەوەی تۆمەتبارەکە لەگەڵ هێزەکانی ئاسایش کارمەندێکی ئاسایشی سلێمانی بەناوی (کۆمیسەر / تێبین جەمال عەزیز) کوژراوە.
ئاسایشی سلێمانی ئەوەشی ڕاگەیاندووە، تۆمەتبارەکەیان دەستگیرکردووە کە ناوی (ن. م. ح)ـە و لە گەڕەکی شێخ عەباسی سلێمانی دادەنیشێت.
